1 – سمعتك هي أهم شئ في الحياه، حافظ عليها وأستثمر فيها علي قد ما تقدر، دلوقتي المشروع اللي بيحتاج شهور و سنين عشان يقف علي رجله ممكن ينهار في خمس دقايق لو عميل تعامل معاك ومكنش مرضي وعمل عنك بوستات في جروبات البلاك ليست وغيرها ..

2 – فكره أنك هتقدم منتج أو خدمه أنت الوحيد اللي بتقدمها أو صعب تقليدها أنساها لأن محدش هيسيبك تاكل التورته لوحدك ..

3 – بلاش تحط رأيك الشخصي ف تصنيع المنتج أو تقديم الخدمه، لأن أشخاص كتير قبلك وأعرفهم معرفه شخصيه، صنعوا منتجات من ذوقهم الشخصي و في النهايه الشريحه المستهدفه مقبلتش المنتجات دي وهنا بتيجي الخساير..

4 – بلاش تصنع في البدايه كميات كبيره، صنع كميات صغيره وشوف وضع السوق أيه الأول وهل العميل متقبل المنتج دا ولا لا..

5 – مشتغلش في حاجه أنت مش فاهم فيها، ولو مصمم ف أشتري الخبره، هات حد عنده خبره في المجال دا يدير هو مكانك..

نقطه مهمه جداً حابب أوضحها، الأستعجال في الربح هيخليك تحبط بسرعه، بلاش تبص علي مشروع متأسس من عشر سنين أو حتي خمس سنين وتقول أنا عايز أبيع زيه دلوقتي وأنت لسه بتبدأ، ولو دا تفكيرك ف متفكرش تعمل مشروع نصيحه عشان هتهلك فلوسك علي الفاضي..

لو نجحت هتكون مصدر رزق ليك مدي الحياه، لكن أوعي تنسي أن كل حاجه فيها مكسب وخساره، و أن التخطيط الصح والبحث التسويقي وكل الدراسات اللي قبل تأسيس المشروع هي لتقليل أي خساير ممكن تحصل لا قدر الله ..

 ف بلاش تقول أن منتجي بيبيع نفسه، مفيش حاجه أسمها كده، وإلا بقي كانت مصر كلها أشتغلت فيها ..

الأهتمام بعميلك بتقديم خدمه كويسه في التعامل و خدمه ما بعد البيع، لأني بشوف ردود غريبه وأصحاب المشاريع دي بيكونوا مبسوطين بكده وناسيين أن العميل دا هو اللي فاتح بيوتهم وشغالين عشانه ..

 تعامل مع شركه شحن كويسه وسريعه حتي لو التكلفه أغلي ، شركه الشحن قادره تخسرك كل عملائك سواء بالتأخير في التوصيل أو أن الاوردرات تتبهدل ف العميل هيرفض الأستلام وقتها ..